गजल

हिड्नेहरुलाई खुकुरीको, धार हो जिन्दगी
जित्नेहरुलाई सहनै पर्ने, हार हो जिन्दगी

खोज्न सके आफै भित्र छ, बीनाको सुगन्ध
नखोज्नेहरुलाई उही पिरो, खार हो जिन्दगी

धर्म होे आगोको आफू, जलेर छर्नु उज्यालो
नजल्नेहरुलाई केवल चिसो, छार हो जिन्दगी

चौका हान्छन् मौकामा, शूरहरु अघि सरी
निर्धाहरुलाई के को मौका ? भार हो जिन्दगी

उडि छुन्छन् चन्द्रमा, मान्छे रुपी जाँगरहरु
अल्छेहरुलाई सधैं आईतवार हो जिन्दगी ।