गजल

एक पटक मात्र होइन हजुर, बारम्बार हुन्छ यहाँ
राज्यको ढुकुटी रित्याई नेताको, उपचार हुन्छ यहाँ

साधरण जनतालाई म्याद गुज्रेको, त्यो सिटामोल बाँडेर
नेता विदेशी अस्पताल पठाउने, सरकार हुन्छ यहाँ

पत्याउनै पनि पो गाह्रो भैसक्यो, को सद्दे को बिरामी ?
एउटा फिर्न पा’छैन अर्को जान, तम्तयार हुन्छ यहाँ

देशमा सुविधा सम्पन्न अस्पताल, नभएर नै पो हो की ?
नेताहरुको ध्यान–दृष्टी सधैं, सिमापार हुन्छ यहाँ

कुर्सीमा बसेकाहरुले बेलैमा, होस् पुर्याएनन् भने
यही गजलको कसमले भेटोस्—मारामार हुन्छ यहाँ