म र वास्तविकता

म मर्दा मुर्दा सँगै
जे—जे लिएर जान्छु
हो त्यही हो मेरो सम्पत्ति
न कसैले खोस्न सक्छ
न मट्टीले शोस्न सक्छ

म सर्वाङ्ग नाङ्गो हुँदा
जे देखिन्छ छोपिएको
कथित गोप्य अङ्ग
हो, त्यही मेरो जात
न कसैले बदलदिन सक्छ
न कसैले खोसेर लिन सक्छ ।
म एक्लै हुँदा जे गर्छु
गर्न हुने/गर्न नहुने,
म मनमा जे सोच्छु
सोच्न हुने/सोच्न नहुने,
हो त्यही मेरो धर्म हो
कसैसँग मिल्न पनि सक्छ
सबैसँग नमिल्न पनि सक्छ ।
म जहाँ जन्मिएँ
कसैको कोखमा
चाहेर पनि/ नचाहेर पनि
तब खान सिकें, लाउन सिकें
नाच्न, गाउँन, हाँस्न सिकें
उठ्न, हिंड्न, लाउन सिकें
त्यो मेरो संस्कृति
परिवर्तनशिल छ समयानुुकुल
जन्मेदेखि अहिलेसम्म
यहि अनुभव गरिरहेछु ।
र, आज म सँग
जे-जे जोडिएका छन् आवरणमा
ती जम्मै पाखण्डी समाजले बनाएको
भ्रष्ट संस्कारहरु हुन्
जो सँग मृत्यु पर्यन्त
मेरो लडाँई जारी रहने छ ।