छोरीलाई शुभकामना, जन्म दिनको

यतिबेला
घुर्यानभरि मकैको बोट/ सिमसारमा धानको बिऊ
नचाउँदै कलिला पात हावामा...
माथी...माथी
बादलका स-साना टुक्राहरुमा
छेलिन्दै निस्किन्दै
उभै उभै
बेग हानिरहेको कर्याङकुरुङ देखेर
उचालिन्दैछ दिनरात
जमिनभन्दा माथि-माथी
र,
छोरी तिमी पनि
चढ्दै छौ आजै देखि
उमेरको अर्को खुट्किलो ।

यो बेला
घरै छेउको बाँस झ्याङमा बसेर
'कुक्कु' खेल्न हाजिर छ कोइली
कोठेबारीमा मग्मगाउँदैछ इन्द्रकमल
मट्याङ्ग्रा बाट्दैछन् सुन्तला बोट
चल्ला हुर्काउँदैछ आरुको रूख
ऐना टल्काउँदैछ पानी-पँधेरो
चिर्दै सन्नाटा ढोल र झ्याम्टाले
गाउँदैछ निरन्तर स्यामुना भाका
नाच्दैछन् सिली तोयामा-खियामा
केवल तिम्रो जन्मोत्सवमा ।
हो हामी
प्रकृतिलाई पर राखेर
कुनै अलौकिक शक्तिलाई नस्विकार्ने
एउटा आदिम जाती
निभाएर बलेको दियो
काटेर एक डल्लो केक
ताली पड्काउँदै
ह्याप्पी बर्थ डे टु यू
अहँ यसो भन्न जान्दैनौ पनि
र,
मान्दैनौ पनि ।
त्यसैले
उनै प्रकृतिको
गाउँदै महिमा रिसियामा
टाढैबाट भनिरहेछु
छोरी 'सिम्मा'
जन्म दिनको शुभकामना ।