घाम, तारा र सम्बन्ध

ताराहरु,
बादलको खास्टो ओढेर
संसाझैँ निदाउन् भातेनिन्द्रा...
वा,
चुहिएर आकाशबाट एक-एक गर्दै
हराउन् सून्यमै बेखबर
के मतलब मान्छेलाई ?
मात्र,
जून हराएको मौका छोपेर
ढकमक्क फूल्दा वा ! भन्नू बाहेक ।

परन्तु,
करोडौं करोड पिण्डहरुको बीचमा
उसैगरी झुन्डिएको एउटा घाम
सधैं-सधैं गाली खान्छ मान्छेको
सधैं-सधैं ताली खान्छ मान्छेको ।
त्यसैले,
घामलाई हेरेर यसो भन्न सकिन्छ
कि, गाली र ताली पाउन तातो हुनुपर्छ
कि, आफ्नै आफन्तको सातो हुनुपर्छ ।