गीत

पहेंलो सारी, फूलबुट्टेपारी, हरियो चौबन्दी
शीरमा सेतो हिमाल ओढी, बसेकी लोकन्ती...
के होला नाम तिनको भनी, सोध्दैछन् साराले
नेपाल भनी बोलाउँछन् हजुर, मलाई प्याराले

होलीको रङ्ग दलेर ज्यानमा स्यामुना गाउँछु
देउडा र सेलो नाचेर फेरि रोधी घर धाउँछु
बजाउँदै धिमे, च्याब्रुङ र मादल माघीमा रमाउँछु
सयौं छन् भाषा, संस्कृति यहाँ यसैमा हराउँछु
जूनले गाउँछ हाक्पारे हुर्रा, संगिनी ताराले
नेपाल भनी बोलाउँछन्, हजुर मलाई प्याराले ।

पूर्वमा लिम्बू, राई र कोच, पश्चिममा मगर
गुरुङ, तामाङ, थारु छन् यहाँ, छन् शेर्पा, नेवार
ब्राम्हण, क्षेत्री, दशनामी, शिल्पी, मधेशी, हिमाली
विविधता भित्र एकता बोक्ने जाति हो नेपाली
बिनायो गाउँछ यहि नै कथा, मोहिनी पाराले
नेपाल भनी बोलाउँछन् हजुर, मलाई प्याराले ।