नाकाबन्दी

म देश भित्रै
देश चलाउनेहरुको घेराबन्दीमा छु
सायद त्यसैले ...
नाकाबन्दीले नछोएको हुनुपर्छ ।

नाकाबन्दीले छुन,
राष्ट्रियताको नमिठो गन्ध
प्रत्येक स्वासप्रस्वासमा निस्कनु पर्छ
जो दाँतमा आफैले जमाएका बिकारहरु
दाँतेगुहु बनेको होस्
वा,
कसैले घोकाएर झुटो इतिहास
तैयार पारिएका एकहुल जत्थाको रगतमा
सुटुक्क जाँड घोलेर
भुत्ते खुकुरी अगाडि राखिदिएको होस्
म दुवै परिन,
सायद त्यसैले
नाकाबन्दीले नछोएको हुनुपर्छ ।

नाकाबन्दीले छुन
सुगाका कलिला प्वाँखहरु काटिदिएर
पिंजडामा कैद गरेपछि
'कृष्ण कहौ' बोलेको दिन
उफ्री उफ्री आँगनमा नाच्न सिकेको हुनुपर्छ वा,
उसैको श्रमले उब्जिएर
उसैको श्रमले पाकेको खाना
नमिठो भएको निहुँमा
उसैलाई लात मार्न जानेको हुनुपर्छ
म दुवै परिन
सायद त्यसैले
नाकाबन्दीले नछोएको हुनुपर्छ ।

म घर भित्रै
घरैकाहरुबाट यूगौंदेखि घेरिएको मान्छे
यतिबेला नाकाबन्दीले भन्दा
मधेस र मधेसीको पीडाले
थारु र थारुवानको पीडाले
बढी छोइएको छु ।