मृत्युन्मुख सीमाहरु

दसगजामा उभिएको
जङ्गे पिलर होस्
वा,
समानान्तर कोरिएका लम्बेतान रेखाहरु—
यी काल्पनिक सीमाहरुले
मानवीय चेतना र प्रेमलाई
कहिल्यै रोक्न सक्दैनन्
कहिल्यै छेक्न सक्दैनन् ।

प्रकृति गतिशिल छ
समय गतिशिल छ
प्रकृति र समयको गतिशिलतामा
पुराना पातहरु खस्दै जान्छन्
नयाँ मुनाहरु पलाउँदै जान्छन्
जसरी ढालियो बर्लिन पर्खाल
जसरी मेटियो भियतनामिज रेखा
त्यसैगरी मेटिनेछन् संसारबाट एकदिन
कथित राज्यले निर्माण गरेका खुनी सीमाहरु
किनकि,
जङ्गे पिलर र समानान्तर रेखाहरुले
मानविय चेतना र प्रेमलाई
कहिल्यै रोक्न सक्दैनन्
कहिल्यै छेक्न सक्दैनन् ।