(बेखबर-मलेसिया)

यो बर्ष
सबैभन्दा बढी रेमिट्यान्स भित्रियो देशमा...
मलेसियाबाट ।

यो बर्ष
सबैभन्दा बढी लास भित्रिए
मलेसियाबाट ।
र,
यो बर्ष
सबैभन्दा बढी त्रास भित्रियो
मलेसियाबाट ।
परन्तु,
सरकार र पार्टीहरुको बहिखातामा
अझै चढ्न सकेको छैन मलेसियाको नाम ।
किनकि,
चुहिएको घरको छानो टाल्दा-टाल्दै
भत्किएको घरको पर्खाल हाल्दा-हाल्दै
थपिएको सरकारी उर्दि,
चर्पी,
सुधारिएको चुलो/गोठ,
पशुमुत्र संकलन ट्याङ्की,
र,
गोबरग्याँस प्लान्ट जोड्दा-जोड्दै
केटा-केटीको ड्रेस, कापी, कलम,
टिफिन, फी
नुन, भुटुन, तरकारी, चामल
बृद्ध बाबू-आमाको जीवन
र,
तरुनी स्वास्नीको हाँसो किन्दा-किन्दै
ठिक्क छ मलेसिया
दिक्क छ मलेसिया ।
त्यसैले,
चुनावमा,
अधिवेशनमा,
महाधिवेशनमा
पार्टीहरुको खातामा चन्दा
जम्म गर्दिन सकेको छैन मलेसियाले ।
र त,
भित्राए पनि सबैभन्दा बढी रेमिट्यान्स
खबर भित्रै बेखबर छ मलेसिया ।